ධීවර, ජලජ හා සාගර සම්පත් අමාත්‍යාංශයේ ලේකම් ආචාර්ය බී. කේ. කෝලිත කමල් ජිනදාස මහතාගේ ප්‍රධානත්වයෙන් පැවති නිල ප්‍රංශ දූත මෙහෙවරේ තෙවන දිනයේදී (ජූනි 27) සමුද්‍ර විද්‍යාව සහ තාක්ෂණය සම්බන්ධයෙන් වැදගත් ආයතන දෙකක් සමඟ ඵලදායී සාකච්ඡා පවත්වන ලදී. 

මෙම සාකච්ඡා මගින් පවතින සහයෝගීතා සබඳතා තවදුරටත් ශක්තිමත් කර ගැනීමට අපේක්ෂා කෙරේ.

Concarneau, Brest හි පිහිටි ප්‍රංශ ජාතික ස්වභාවික ඉතිහාස කෞතුකාගාරය වෙත පැමිණි අමාත්‍යාංශ ලේකම්වරයා ඇතුළු කණ්ඩායම, එහිදී ස්ථාන ප්‍රධානී ආචාර්ය Guillaume Massé මහතා සමඟ සුහද හා ඵලදායී සාකච්ඡාවක් පැවැත්වූහ.

මෙහිදී ප්‍රධාන වශයෙන් අවධානය යොමු වූයේ; ශ්‍රී ලංකාවේ විශේෂ කෞතුකාගාර ප්‍රදර්ශනයක් පැවැත්වීමේ හැකියාව ගවේෂණය කිරීම, සමුද්‍ර මත්ස්‍ය විද්‍යා පුහුණුව කේන්ද්‍ර කරගත් හුවමාරු වැඩසටහන් ආරම්භ කිරීම, මුහුදු කූඩැල්ලන් සහ මුහුදු අශ්වයන් වැනි සතුන් බෝ කිරීමේදී මරණ අනුපාතය අවම කිරීමේ ක්‍රමවේද ඇතුළු විශේෂඥ දැනුම බෙදාහදා ගැනීම සහ බහු-සංස්කෘතික පර්යේෂණ සහයෝගීතාව තවදුරටත් ඉදිරියට ගෙන යාම පිළිබඳවයි.

පසුව, CLS (Collecte Localisation Satellites SA) ආයතනයේ නිලධාරීන් හමු වූ අතර, ඔවුන්ගේ චන්ද්‍රිකා දත්ත ලබා ගැනීමේ හා විශ්ලේෂණ පහසුකම් පිළිබඳව දැනුවත් වීමක් සිදු විය. එහිදී සාකච්ඡා කෙරුණු ප්‍රධාන කරුණු වූයේ; බහු-ආයතන භාවිතය (MEPA, NARA, DFAR, ආදිය) සඳහා චන්ද්‍රිකා පදනම් කරගත් තාක්ෂණික මධ්‍යස්ථානයක් පිහිටුවීම, ඉහළ විභේදන චන්ද්‍රිකා ඡායාරූප ලබා ගැනීම සඳහා ඇති අවස්ථා සහ NEMO කුඩා බෝට්ටු නිරීක්ෂණ පද්ධතියේ ප්‍රායෝගික භාවිතයන්ය.

මීට අමතරව, Quiet Oceans හි Maud Duma මහත්මිය සමඟද සාකච්ඡා පවත්වන ලදී. එහිදී සමුද්‍ර ක්ෂීරපායීන්ගේ ශබ්ද හඳුනා ගැනීම සහ හැසිරීම් විශ්ලේෂණය සඳහා ඔවුන්ගේ Smartpam වැනි හිමිකාරිත්ව මෙවලම් භාවිතය පිළිබඳව වැදගත් අදහස් හුවමාරුවක් සිදු විය.

මෙම සාකච්ඡා මගින් නුදුරු අනාගතයේදී ශ්‍රී ලංකාවේ ධීවර හා සාගර සම්පත් කළමනාකරණය සඳහා අර්ථවත් සහයෝගීතාවයකට සහ නව ක්‍රියාත්මක කිරීම්වලට මග පෑදෙනු ඇතැයි විශ්වාස කෙරේ.