වසර දහයකට අධික කාලයකට පසු මෙරට ධීවර කර්මාන්තයේ තිරසර සංවර්ධනය සහ ඩිජිටල්කරණය ඉලක්ක කරගත් "ජාතික ධීවර යාත්‍රා සංගණනය - 2025", ධීවර, ජලජ හා සාගර සම්පත් අමාත්‍ය, රාමලිංගම් චන්ද්‍රසේකර් මහතාගේ සහ නියෝජ්‍ය අමාත්‍ය, රත්න ගමගේ මහතාගේ ප්‍රධානත්වයෙන් අද (04) දින පානදුර ධීවර වරායේදී නිල වශයෙන් ආරම්භ විය.
ධීවර, ජලජ හා සාගර සම්පත් අමාත්‍යාංශය සහ "ක්ලීන් ශ්‍රී ලංකා" වැඩසටහන එක්ව සංවිධානය කරන මෙම දීපව්‍යාප්ත සංගණනය අගෝස්තු 20 වනදා දක්වා ක්‍රියාත්මක වේ. මෙහි සමාරම්භය සනිටුහන් කරමින්, අමාත්‍යතුමා සහ නියෝජ්‍ය අමාත්‍යතුමා විසින් ධීවර යාත්‍රාවල සංගණන ස්ටිකර් ඇලවීම සහ ටැබ් පරිගණක මගින් දත්ත පද්ධතියට තොරතුරු ඇතුළත් කිරීම සිදු කරන ලදී. අනතුරුව, එතුමන්ලා පානදුර ධීවර වරායේ ධීවර ප්‍රජාව සමඟ සුහද කතාබහක නිරත විය.
මෙම අවස්ථාවට එක්වෙමින් අදහස් දැක්වූ ධීවර, ජලජ හා සාගර සම්පත් අමාත්‍ය, රාමලිංගම් චන්ද්‍රසේකර් මහතා මෙසේ පැවසීය:
"පසුගිය වසර 10ක් පුරා මෙවැනි සංගණනයක් සිදු කර නොමැති වීම නිසා, රටේ සැබෑ ධීවර යාත්‍රා සංඛ්‍යාව, ඒවායේ තත්ත්වය, සහ ධාරිතාව පිළිබඳ නිශ්චිත දත්ත අප සතුව තිබුණේ නැහැ. මෙම තත්ත්වය, ධීවර කර්මාන්තය නවීකරණය කිරීමටත්, ධීවර ප්‍රජාවට අවශ්‍ය සහන සැලසීමටත් විශාල බාධාවක් වුණා. අද අපි මේ ආරම්භ කරන්නේ, සම්පූර්ණයෙන්ම තොරතුරු තාක්ෂණය මත පදනම් වූ ඩිජිටල් සංගණනයක්. මෙහි අරමුණ, අපේ රටේ ධීවර කර්මාන්තය පාරම්පරිකව මාළු අල්ලන පිරිසක් සිටින තැනින් ඔබ්බට ගෙන ගොස්, නවීන තාක්ෂණයෙන් සන්නද්ධ, ජාතික ආර්ථිකයට ඩොලර් උපයන, ගුණාත්මක ප්‍රෝටීන් අවශ්‍යතාව සපුරන නවීන කර්මාන්තයක් බවට පරිවර්තනය කිරීමයි. මෙම සංගණනය හරහා කැඩී ගිය හා භාවිතයෙන් ඉවත් කළ යාත්‍රා හඳුනාගෙන ඒවා නිසි ලෙස කළමනාකරණය කිරීමෙන්, 'ක්ලීන් ශ්‍රී ලංකා' වැඩසටහන යටතේ අපේ මුහුදු සම්පත ආරක්ෂා කිරීමටත් පියවර ගන්නවා. මෙම ජාතික වැඩසටහන සාර්ථක කරගැනීම සඳහා පූර්ණ සහයෝගය ලබාදෙන මෙන් මම සියලුම ධීවර ජනතාවගෙන් ගෞරවයෙන් ඉල්ලා සිටිනවා."
මෙහිදී අදහස් දැක්වූ නියෝජ්‍ය අමාත්‍ය, රත්න ගමගේ මහතා:
"ඕනෑම රටක සංවර්ධනයට නිවැරදි දත්ත අත්‍යවශ්‍යයි. අප අමාත්‍යාංශයේ පැවති දත්ත දෝෂ සහිත බව අප හඳුනාගත්තා. ඒ නිසා තමයි, මෙම සංගණනය හරහා නිවැරදි දත්ත පද්ධතියක් (Database) ගොඩනැගීමට අපි තීරණය කළේ. මෙම සංගණනය අදියර කිහිපයක් යටතේ ක්‍රියාත්මකයි. පළමුව, පිටත එන්ජින් සවි කළ යාත්‍රා, දෙවනුව බහුදින යාත්‍රා, සහ තෙවනුව සාම්ප්‍රදායික හා මිරිදිය යාත්‍රා සංගණනය කරනවා. 'ක්ලීන් ශ්‍රී ලංකා' වැඩසටහනේ ඉල්ලීමක් වූ, වෙරළ තීරයේ ඉවත දමා ඇති ෆයිබර්ග්ලාස් යාත්‍රා ප්‍රමාණය හඳුනාගැනීමත්, ඒවා 'සීනෝර්' ආයතනය හරහා ප්‍රතිචක්‍රීකරණයට යොමු කිරීමටත් මෙමගින් හැකිවෙනවා. ඒ වගේම ධීවර ප්‍රජාව මුහුණ දෙන ප්‍රධාන ගැටලුවක් වන රක්ෂණ ක්‍රමයක් නොමැති වීම විසඳමින්, 'සයුර' නමින් නව රක්ෂණ ක්‍රමයක් මෙම මස 14 වනදා අපි හඳුන්වා දෙනවා. ආපදාවකදී මියයන ධීවරයෙකුට ලබාදෙන වන්දිය ලක්ෂ 2 සිට ලක්ෂ 10 දක්වා වැඩි කිරීමටත් අපේ රජය දැනටමත් කටයුතු කර තිබෙනවා. මේ සියල්ල හරහා අපේ ඉලක්කය වන්නේ, ජාත්‍යන්තරය සමඟ ගනුදෙනු කළ හැකි, දත්ත මත පදනම් වූ, තිරසාර ධීවර කර්මාන්තයක් ගොඩනැගීමයි."
මෙම සංගණනය මගින් එක්රැස් කරගන්නා සියලු තොරතුරු, අමාත්‍යාංශයේ නව මාර්ගගත දත්ත පද්ධතියට ඇතුළත් කෙරෙන අතර, 2026 වසරේ සිට මෙහෙයුම් බලපත්‍ර නිකුත් කිරීම, සහනාධාර ලබාදීම ඇතුළු සියලු සේවාවන් මෙම සංගණනයට ලක් වූ යාත්‍රා සඳහා පමණක් ලබා දීමට නියමිතය.
මෙම අවස්ථාවට සහභාගී වූවන්:
නිශාන්ත ප්‍රදිනාන්දු මහතා - මොරටුව නගරාධිපති
බී.ඒ.පී. කපිල බමුණුආරච්චි මහතා - සභාපති, ලංකා ධීවර වරාය නීතිගත සංස්ථාව
සුසන්ත කහවත්ත මහතා - අධ්‍යක්ෂ ජනරාල්, ධීවර හා ජලජ සම්පත් දෙපාර්තමේන්තුව
දසුන් විජේසේකර මහතා - අධ්‍යක්ෂ (සම්බන්ධීකරණ), ක්ලීන් ශ්‍රී ලංකා ලේකම් කාර්යාලය
එස්.පී. ප්‍රේමවර්ධන මහතා - සහකාර අධ්‍යක්ෂ, ධීවර හා ජලජ සම්පත් දෙපාර්තමේන්තුව
