දිවයින වටා පවතින කාලගුණ තත්ත්වය විටින් විට වෙනස් වෙමින් පවතින බැවින්, වෙරළාසන්න මුහුදු තීරයේ ආරක්ෂාව පිළිබඳව ධීවර හා ජලජ සම්පත් දෙපාර්තමේන්තුව සියලුම ධීවර ප්‍රජාව වෙත හදිසි දැනුම්දීමක් සිදු කරයි.

කාලගුණ විද්‍යා දෙපාර්තමේන්තුව විසින් නිකුත් කර ඇති නවතම පුරෝකථන අනුව, පුත්තලම, හලාවත, මීගමුව, කොළඹ, කළුතර, ගාල්ල, මාතර, හම්බන්තොට සහ පොතුවිල් දක්වා වන මුහුදු ප්‍රදේශවල සුළඟේ වේගය පැයට කිලෝමීටර් 70ක් දක්වා ඉහළ යා හැකි අතර, මුහුදු රළ මීටර් 2.5ක් සහ 3ක් අතර උසකට එසවීමේ දැඩි අවදානමක් පවතී.

මේ හේතුවෙන් එම මුහුදු තීරයන්හි වෙරළාසන්නව රැකියාවේ නිරත වන සාම්ප්‍රදායික ධීවර යාත්‍රා, පිටත එන්ජිම සහිත කුඩා ධීවර යාත්‍රා සහ එක්දින ධීවර යාත්‍රා සඳහා නැවත දැනුම් දෙන තුරු මුහුදු යාම වහාම ක්‍රියාත්මක වන පරිදි තහනම් කර ඇත.

සෙසු ප්‍රදේශවල රැකියාවේ නිරත වන ධීවරයින් ද මුහුදු යාමට පෙර පවතින සුළං තත්ත්වය සහ රළ ස්වභාවය පිළිබඳව පෞද්ගලිකව සැලකිලිමත් විය යුතු අතර, ආරක්ෂිතව රැකියාව කළ හැකි යෝග්‍ය තත්ත්වයක් පවතින්නේ නම් පමණක් මුහුදු යන ලෙස උපදෙස් දෙනු ලැබේ. යම් හෙයකින් මුහුද රළු ස්වභාවයක් ගන්නේ නම් රැකියාවට යාමෙන් වැළකී සිටීම ජීවිත ආරක්ෂාවට අත්‍යවශ්‍ය වේ.

විශේෂයෙන්ම, ධීවර රැකියාව සඳහා ගොඩබිමෙන් පිටත්වීමේ සිට රැකියාවේ නිරත වන කාලය සහ නැවත ගොඩබිමට පැමිණෙන තෙක් සම්පූර්ණ කාලය පුරාවටම ජීවිතාරක්ෂක කබා (Life Jackets) පැළඳ සිටීම අනිවාර්ය බව ධීවර දෙපාර්තමේන්තුව අවධාරණය කරයි. මෙය ධීවර පනත යටතේ පනවා ඇති රෙගුලාසි අනුව අනිවාර්ය නීතිමය අවශ්‍යතාවයක් බව ද සිහිපත් කර සිටිමු.

පවතින අයහපත් කාලගුණ තත්ත්වය ඉදිරි දින කිහිපය තුළ ද පැවතිය හැකි බැවින්, කාලගුණ විද්‍යා දෙපාර්තමේන්තුව සහ ධීවර දෙපාර්තමේන්තුව මගින් වරින් වර නිකුත් කරනු ලබන නිල නිවේදන පිළිබඳව දැඩි අවධානයෙන් පසුවන ලෙසත්, තම ජීවිත හා දේපළ ආරක්ෂා කර ගැනීමට වගකීමෙන් කටයුතු කරන ලෙසත් සමස්ත ධීවර ප්‍රජාවගෙන් කාරුණිකව ඉල්ලා සිටිනු ලැබේ.