ශ්රී ලංකාව සහ නෝර්වේ රාජ්යය අතර ධීවර හා ජලජීවී වගා ක්ෂේත්රයේ සහයෝගිතාව තවදුරටත් පුළුල් කිරීමේ අරමුණින්, ධීවර, ජලජ හා සාගර සම්පත් අමාත්ය රාමලිංගම් චන්ද්රසේකර් මහතා සහ නෝර්වේ රාජ්යයේ, බර්ගන්-වෙස්ට්ලන්ඩ් ෆ්ලයික්හි (Bergen-Vestland Flyke) නිර්වේතනික කොන්සල්, ස්ටර්ල් එච්. පෙඩර්සන් (Sturle H. Pedersen) මහතා අතර විශේෂ සාකච්ඡාවක් ඊයේ (16) දින අමාත්යාංශයේදී පැවැත්විණි.
මෙම අවස්ථාව සඳහා ධීවර, ජලජ හා සාගර සම්පත් අමාත්යාංශයේ ලේකම් ආචාර්ය බී. කේ. කෝලිත කමල් ජිනදාස මහතා ද එක්ව සිටියේය.
එළඹෙන අප්රේල් මාසයේදී අමාත්යවරයා නෝර්වේ රාජ්යයේ සිදු කිරීමට නියමිත නිල සංචාරය පිළිබඳව මෙහිදී දීර්ඝ ලෙස සාකච්ඡා කෙරිණි. වත්මන් රජය ශ්රී ලංකාව තුළ දූෂණයෙන් තොර පාලනයක් ස්ථාපිත කර ඇති බැවින්, ජාත්යන්තරයේ, විශේෂයෙන්ම නෝර්වේ ආයෝජකයින් තුළ ශ්රී ලංකාව කෙරෙහි දැඩි විශ්වාසයක් ගොඩනැගී ඇති බව පෙඩර්සන් මහතා මෙහිදී අවධාරණය කළේය. අමාත්යවරයාගේ මෙම සංචාරය, මෙරට ධීවර ක්ෂේත්රය සඳහා නව ආයෝජකයින් ආකර්ෂණය කර ගැනීමට කදිම අවස්ථාවක් වනු ඇති බවද හෙතෙම පෙන්වා දුන්නේය.
ධීවර ක්ෂේත්රයේ ලොව ප්රමුඛතම සහ අති නවීන තාක්ෂණයන් භාවිත කරන නෝර්වේ රාජ්යයේ සහයෝගය ඇතිව, ශ්රී ලංකාවේ 'නීල ආර්ථිකය' (Blue Economy) ශක්තිමත් කිරීම මෙහි ප්රධාන අරමුණයි. ඒ අනුව පහත ක්ෂේත්ර කෙරෙහි විශේෂ අවධානයක් යොමු විය:
* සමුද්රීය පර්යේෂණ සහ තිරසාර ධීවර කළමනාකරණය.
* සාගරික නවෝත්පාදන (Maritime innovation).
* ධීවර වරාය යටිතල පහසුකම් සහ ධීවර යාත්රා ඇණිය නවීකරණය කිරීම.
* රාජ්ය-පෞද්ගලික හවුල්කාරීත්වයන් (PPPs) හරහා තාක්ෂණය මත පදනම් වූ, ඔරොත්තු දෙන ධීවර කර්මාන්තයක් ගොඩනැගීම සඳහා උපායමාර්ගික ආයෝජන.
ශ්රී ලංකාවේ වෙරළබඩ ප්රජාවන්ගේ ජීවනෝපාය නංවාලීම සහ සාගර සම්පත් ආරක්ෂා කිරීම උදෙසා, නෝර්වේ ආයතන සහ කර්මාන්ත නායකයින් සමඟ මෙම සංවාදය අඛණ්ඩව පවත්වාගෙන යාම සහ ඉදිරි සබඳතා වර්ධනය කර ගැනීම සම්බන්ධයෙන් ද මෙහිදී තවදුරටත් සාකච්ඡාවට බඳුන් විය.
