රට පුරා පැතිර යන ගංවතුර ආපදා තත්ත්වය හමුවේ, සිවිල් වැසියන් මුදා ගැනීමේ මෙහෙයුම් සඳහා ධීවර බෝට්ටු වහාම යොමු කරන ලෙස ධීවර, ජලජ හා සාගර සම්පත් නියෝජ්ය අමාත්ය, ගරු රත්න ගමගේ මහතා අදාළ අංශ වෙත උපදෙස් ලබා දුන්නේය.
ආපදා තත්ත්වය කළමනාකරණය කිරීම සඳහා ධීවර ක්ෂේත්රයේ දායකත්වය සම්බන්ධීකරණය කිරීමේ අරමුණින්, ඒ මහතාගේ ප්රධානත්වයෙන් අද (29) දින හදිසි සාකච්ඡාවක් පැවැත්විණි.
මාර්ගගත ක්රමය ඔස්සේ පැවති මෙම හදිසි හමුව සඳහා ධීවර අමාත්යාංශ ලේකම් ආචාර්ය බී. කේ. කෝලිත කමල් ජිනදාස, ධීවර දෙපාර්තමේන්තුවේ අධ්යක්ෂ ජනරාල් සුසන්ත කහවත්ත යන මහත්වරුන් සහ ශ්රී ලංකා නාවික හමුදාවේ ජ්යෙෂ්ඨ කපිතාන්වරයෙකු ද සහභාගී විය.
අවිස්සාවේල්ල, හලාවත සහ කෑගල්ල වැනි ගංවතුරෙන් දැඩි ලෙස පීඩාවට පත් ප්රදේශවල මුදාගැනීමේ මෙහෙයුම් සඳහා පවතින බෝට්ටු හිඟය පිළිබඳව මෙහිදී විශේෂ අවධානය යොමු විය.
"අපේ ජනතාව අතරමං වෙලා. බෝට්ටු හිඟය බරපතල ගැටලුවක්. ඒ නිසා, ධීවර අමාත්යාංශය ලෙස අපි ඒ අඩුව පිරවීමට මැදිහත් වෙනවා," යැයි නියෝජ්ය අමාත්ය රත්න ගමගේ මහතා මෙහිදී ප්රකාශ කළේය. "ආපදා කළමනාකරණ මධ්යස්ථානයෙන් (DMC) ඉල්ලීමක් කළ විගස, අවශ්ය බෝට්ටු ලබා දෙන ලෙස මම අපේ දිස්ත්රික් ධීවර සහකාර අධ්යක්ෂවරුන්ට උපදෙස් ලබා දුන්නා. ශ්රී ලංකා නාවික හමුදාව එම බෝට්ටු ප්රවාහනය සහ මෙහෙයවීම සම්බන්ධීකරණය කර, වේගවත් සහ සංවිධානාත්මක මුදාගැනීමේ මෙහෙයුමක් සහතික කරනු ඇත."
මෙම තීරණයෙන් අනතුරුව, ජාතික මුදාගැනීමේ මෙහෙයුමට සහය වීම සඳහා, කොළඹින් බෝට්ටු 30ක්, මීගමුවෙන් 20ක් සහ අලුත්ගමින් 20ක් වහාම පිටත් කර හැරීමට ධීවර දෙපාර්තමේන්තුව මේ වන විටත් කටයුතු යොදා ඇත.
මුදාගැනීමේ මෙහෙයුම්වලට සමගාමීව, ආපදාවෙන් පීඩාවට පත් ධීවර ප්රජාවට සහන සැලසීම සඳහා ද නියෝජ්ය අමාත්යවරයා විසින් පුළුල් සැලැස්මක් ක්රියාත්මක කරන ලදී:
ක්ෂණික හානි තක්සේරුව: ධීවර යාත්රා, ආම්පන්න සහ ජලජීවී වගා මධ්යස්ථානවලට සිදු වූ හානි පිළිබඳව වහාම තක්සේරු වාර්තාවක් ලබා දෙන ලෙස ධීවර දෙපාර්තමේන්තුවට සහ ජාතික ජලජීවී වගා සංවර්ධන අධිකාරියට (NAQDA) නියෝග කෙරිණි.
ධීවරයින්ට සෘජු සහන: ලබා දෙන ඕනෑම සහනයක් අතරමැදියන්ගෙන් තොරව, සෘජුවම අදාළ ධීවරයා වෙත ලබා දිය යුතු බවට අවධාරණය කෙරිණි. රැකියාවට යාමට නොහැකි වූ ධීවර පවුල් සඳහා වියළි සලාක මල්ලක් ලබා දීමේ යෝජනාවක් ජනාධිපති ලේකම් කාර්යාලය වෙත ඉදිරිපත් කිරීමට ද නියමිතය.
යටිතල පහසුකම් පිළිසකර කිරීම: ධීවර වරායන් සහ තොටුපළවල් වෙත දිවෙන, හානියට පත් ප්රවේශ මාර්ග පිළිබඳව කඩිනම් සමීක්ෂණයක් පවත්වා, පිළිසකර කිරීමේ කටයුතු කඩිනම් කිරීමට ද උපදෙස් ලබා දෙන ලදී.
නොවැම්බර් 26 වන දින අමාත්යාංශය විසින් නිකුත් කරන ලද පූර්ව අනතුරු ඇඟවීම්, මුහුදේ සිදුවිය හැකිව තිබූ මහා විපතක් වළක්වා ගැනීමට ඉවහල් වූ බව සිහිපත් කළ නියෝජ්ය අමාත්යවරයා, එම උපදෙස් පිළිපැදි ධීවර ප්රජාවට සිය ස්තූතිය පුද කළේය.
