ධීවර හා ධීවර නිෂ්පාදන සඳහා දේශීය හා ජාත්‍යන්තර වෙළඳපොළවල් තුළ පවතින ඉල්ලුම ඉහළ යමින් පැවතීම හේතුවෙන් වෙරළ රාජ්‍යයන්ට සිය ජාතික ආර්ථිකයන්හි ධීවර හා ජලජීවි වගා කර්මාන්තයේ දායකත්වය වැඩි කර ගැනීමේ අවස්ථාවන් නිර්මාණය වී තිබේ. මෙම අවස්ථා වලින් තිරසාර ලෙස ප්‍රතිලාභ ලැබීමට නම් ධීවර හා ජලජීවි කර්මාන්ත පාදක වී ඇති සම්පත් අධිපරිභෝජනයට ලක් නොකර ඒවායේ නිෂ්පාදනය ප්‍රශස්තකරණය කිරීම අවශ්‍ය වේ. ශ්‍රී ලංකාවේ ධීවර හා ජලජීවී වගා සංවර්ධනය සඳහා නව ආයෝජන කළ යුතුව ඇත. මෙම ක්ෂේත්‍රය තුළ ආයෝජනය කිරීමට දේශීය හා විදේශීය ආයෝජකයන් තුළ විශ්වාසය ගොඩ නැංවීම සඳහා මූලික අවශ්‍යතාවයක් වන්නේ රජයේ පොදු ආර්ථික හා සමාජ සංවර්ධන ප්‍රතිපත්තියට අනුකූල ස්ථාවර ජාතික ධීවර හා ජලජීවි වගා ප්‍රතිපත්තියක් තිබීම ය. එමෙන් ම ධීවර සම්පත් සංරක්ෂණය හා කළමනාකරණය සඳහා වන කලාපීය හා අන්තර්ජාතික සම්මුතීන්හි දක්වා ඇති අවශ්‍යතාවන්ට ක්ෂේත්‍රයේ සංවර්ධනය හා කළමනාකරණය අනුකූල වන බවට වග බලා ගැනීම ද අවශ්‍ය වේ.
මෙවැනි තත්වයක් යටතේ ධීවර හා ජලජ සම්පත් සංවර්ධන අමාත්‍යාංශය එය යටතේ ක්‍රියාත්මක වන දෙපාර්තමේන්තු සහ නියෝජිතායතන හා එක්ව විස්තීර්ණ උපදේශකත්ව ක්‍රියාවලියකින් අනතුරුව මෙම ලේඛනය මගින් ඉදිරිපත් කොට ඇති ජාතික ධීවර හා ජලජීවී වගා ප්‍රතිපත්තිය සම්පාදනය කර ඇත. මෙම ප්‍රතිපත්තිය සම්පාදනය කිරීම සඳහා අවශ්‍ය උපදේශක සේවාවන් නෝර්වීජියානු රජයේ වෙළඳ, කර්මාන්ත හා ධීවර අමාත්‍යාංශයේ ධීවර හා ජලජීවීවගා දෙපාර්තමේන්තුව විසින් ද්වි-පාර්ශ්වික සහයෝගිතා ගිවිසුමක් යටතේ සපයන ලදී.
වැඩිදුර විස්තර සඳහා : ජාතික ධීවර හා ජලජීවී වගා ප්‍රතිපත්තිය බාගත කරගන්න
