කොළඹ දිස්ත්‍රික්කයේ ධීවර ප්‍රජාව මුහුණ දෙන දැවෙන ගැටලු හඳුනාගෙන ඒවාට ස්ථිර විසඳුම් ලබාදීම අරමුණු කරගත් “කොළඹ දිස්ත්‍රික් ධීවර සම්බන්ධීකරණ කමිටු රැස්වීම” ධීවර, ජලජ හා සාගර සම්පත් නියෝජ්‍ය අමාත්‍ය රත්න ගමගේ මහතාගේ ප්‍රධානත්වයෙන් සහ සම්බන්ධීකරණ කමිටු සභාපති පාර්ලිමේන්තු මන්ත්‍රී ලක්ෂ්මන් නිපුණ ආරච්චි මහතාගේ සහභාගීත්වයෙන් ඊයේ (16) කොළඹ දිස්ත්‍රික් ලේකම් කාර්යාලයේදී පැවැත්විණි.

මෙහිදී නියෝජ්‍ය අමාත්‍යවරයා විසින් විශේෂ ප්‍රතිපත්තිමය තීරණයක් දැනුම් දුන් අතර, වෙරළාසන්න ප්‍රදේශවල කිසිදු ප්‍රයෝජනයකට නොගෙන අතහැර දමා ඇති පොදු ගොඩනැගිලි වහාම හඳුනාගෙන ඒවා ධීවර ප්‍රජාවගේ උන්නතිය වෙනුවෙන් ඵලදායී ලෙස භාවිත කිරීමට පියවර ගන්නා ලෙස නිලධාරීන්ට උපදෙස් දුන්නේය. එම ගොඩනැගිලි ප්‍රතිසංස්කරණය කර ධීවර සමිති කාර්යාල, මත්ස්‍ය අලෙවි මධ්‍යස්ථාන හෝ ප්‍රජා සේවා කටයුතු සඳහා යොදාගැනීමට ධීවර සංවිධාන සක්‍රීයව මැදිහත් විය යුතු බවද ඒ මහතා අවධාරණය කළේය.

මෙම රැස්වීමේදී සාකච්ඡාවට බඳුන් වූ අනෙකුත් ප්‍රධාන ගැටලු සහ විසඳුම් පහත පරිදි වේ:
* අනවසර ඉදිකිරීම් සහ කළපු ආක්‍රමණය: මොරටුව සහ අවට වෙරළාසන්න ප්‍රදේශවල සිදුවන අනවසර ඉදිකිරීම් හේතුවෙන් ධීවර කටයුතුවලට සිදුවන බාධා පිළිබඳව අවධානය යොමු විය. මේ සම්බන්ධයෙන් වෙරළ සංරක්ෂණ දෙපාර්තමේන්තුව සහ මැනුම් දෙපාර්තමේන්තුව ඒකාබද්ධව සීමා නීර්ණය කර අදාළ නීතිමය පියවර ගන්නා ලෙස අමාත්‍යවරයා උපදෙස් දුන්නේය.
* කසළ කළමනාකරණය සහ පරිසර දූෂණය: කළපු සහ වෙරළ තීරයට කැලි කසළ බැහැර කිරීම වැළැක්වීම සඳහා පළාත් පාලන ආයතන සමඟ එක්ව විධිමත් වැඩපිළිවෙළක් සකස් කිරීමට තීරණය විය.
* යටිතල පහසුකම් සංවර්ධනය: ධීවර තොටුපළවල් ආශ්‍රිතව පවතින වැසිකිළි, නළ ජලය සහ විදුලිය වැනි මූලික අවශ්‍යතා කඩිනමින් සම්පූර්ණ කර දීමට ද මෙහිදී එකඟතාව පළ විය.
* ධීවරයින්ගේ ආරක්ෂාව: මුහුදු යාමේදී ජීවිතාරක්ෂක කබා පැළඳීම අනිවාර්ය කිරීමටත්, ධීවර සන්නිවේදන පද්ධති සක්‍රීයව පවත්වාගෙන යාමටත් නිලධාරීන්ට සහ ධීවර සමිතිවලට උපදෙස් ලබා දෙන ලදී.

මෙහිදී අදහස් දැක්වූ නියෝජ්‍ය අමාත්‍යවරයා වැඩිදුරටත් කියා සිටියේ, ධීවර ක්ෂේත්‍රය යනු රටේ නිෂ්පාදන ආර්ථිකයේ වැදගත් පුරුකක් බැවින්, නිලධාරීන් සහ ධීවර ප්‍රජාව අතර මනා සම්බන්ධීකරණයක් පවත්වා ගනිමින් පවතින පරිපාලනමය බාධාවන් ඉවත් කළ යුතු බවයි.

මෙම අවස්ථාව සඳහා පාර්ලිමේන්තු මන්ත්‍රී නීතිඥ ලක්මාලි හේමචන්ද්‍ර මෙනවිය, පාර්ලිමේන්තු මන්ත්‍රී සමන්මලී ගුණසිංහ මහත්මිය, මොරටුව නගරාධිපති කේ.ඩී. නිශාන්ත ප්‍රනාන්දු මහතා සහ දිස්ත්‍රික් ලේකම් ගිනිගේ ප්‍රසන්න ජනක කුමාර මහතා ඇතුළු ධීවර අමාත්‍යාංශයේ සහ දෙපාර්තමේන්තුවේ උසස් නිලධාරීන් පිරිසක් සහභාගී වූහ.