மீன்பிடித் துறைக்குப் புதிய தலைமுறைத் தொழில்சார் மட்டத்திலான தொழிலாளர் படையை உருவாக்கும் நோக்கில், மாவட்ட மட்டத்தில் தெரிவு செய்யப்பட்ட இளைஞர்களை மீன்பிடித் தொழில்நுட்பப் பணியாளர்களாகப் பயிற்றுவிக்கும் திட்டத்தின் கீழ், 20 இளைஞர்களின் பங்கேற்புடன் தொடக்கப் பயிற்சித் திட்டம் அண்மையில் வெற்றிகரமாகத் தொடங்கப்பட்டது.

இலங்கையின் மீன்பிடித் துறையில் பயிற்றப்பட்ட, திறமையான மீன்பிடித் தொழில்நுட்பப் பணியாளர்களுக்கான தேவை படிப்படியாக அதிகரித்து வருகின்றது. குறிப்பாக, புதிய தலைமுறை இளைஞர்களை இத்துறைக்கு ஈர்ப்பதும், அவர்களுக்கு நீண்ட தூண்டில் (longline) மீன்பிடி முறை, பாதுகாப்பான மீன்பிடிச் செயற்பாடுகள் மற்றும் பொறுப்புள்ள மீன்பிடித் தொழில் குறித்த தேவையான அறிவையும் திறன்களையும் வழங்குவதும் இத்திட்டத்தின் பிரதான நோக்கமாகும்.

இப்பயிற்சித் திட்டம் தங்கிப் பயிலும் (உறைவிட) பயிற்சித் திட்டமாக நடைமுறைப்படுத்தத் திட்டமிடப்பட்டுள்ளது. முழுப் பயிற்சிக் காலத்தில் 03 நாட்கள் கோட்பாட்டுப் பயிற்சியும், 02 நாட்கள் simulator அடிப்படையிலான பயிற்சியும் வழங்கப்படவுள்ளன. கோட்பாட்டுப் பயிற்சியில் மீன்பிடிச் செயற்பாடுகள் தொடர்பான சட்டங்கள் மற்றும் ஒழுங்குவிதிகள், ஆழ்கடல் மற்றும் சர்வதேசக் கடல் மீன்பிடி நடவடிக்கைகள், மீன்பிடிக் கலங்களின் இயக்கம் மற்றும் பாதுகாப்பு, மீன்பிடி உபகரணங்களின் பயன்பாடு, மீன் அறுவடையைக் கையாளுதல் மற்றும் தரத்தைப் பேணுதல், கடல் வானிலை நிலைமைகள், கடல் மாசடைதலைத் தடுத்தல் மற்றும் சுற்றாடல் பாதுகாப்பு உள்ளிட்ட துறைக்குரிய முக்கிய விடயங்கள் பற்றிய அறிவை வழங்க எதிர்பார்க்கப்படுகிறது.

மேலும், simulator அடிப்படையிலான பயிற்சியின் மூலம், உண்மையான கடல் சூழலில் ஏற்படக்கூடிய பல்வேறு நிலைமைகளை உருவகப்படுத்தி, மீன்பிடிக் கலங்களை இயக்குதல், பாதுகாப்பாகச் செயற்படுதல், குழுவாகச் செயற்படுதல் மற்றும் அவசர சூழ்நிலைகளில் சரியான தீர்மானங்களை எடுத்தல் தொடர்பான நடைமுறை அறிவை வழங்க நடவடிக்கை எடுக்கப்படுகிறது. கடலுக்குச் செல்வதற்கு முன்னர் பயிற்சி பெறுவோரின் தொழில்நுட்ப அறிவையும் தயார்நிலையையும் மேம்படுத்த இப்பயிற்சி உதவும்.

இத்திட்டத்தின் மூலம், தெரிவு செய்யப்பட்ட இளைஞர்களுக்கு மீன்பிடித் துறையில் நுழைவதற்குத் தேவையான அடிப்படை அறிவையும் திறன்களையும் வழங்குவது மட்டுமன்றி, பொறுப்புள்ள, பாதுகாப்பான மற்றும் நிலைபேறான மீன்பிடித் தொழிலுக்குப் பங்களிக்கக்கூடிய புதிய தலைமுறையை உருவாக்கவும் எதிர்பார்க்கப்படுகிறது.

இப்பயிற்சித் திட்டத்தை மாவட்ட மட்டத்தில் தொடர்ச்சியாக நடைமுறைப்படுத்த எதிர்பார்க்கப்படுவதுடன், மீன்பிடித் துறையில் நிலவும் பயிற்றப்பட்ட தொழிலாளர் பற்றாக்குறைக்குத் தீர்வு வழங்கவும், இளைய தலைமுறையினருக்கு உள்நாட்டு மற்றும் வெளிநாட்டு வேலை வாய்ப்புகளையும் தொழில்சார் வாய்ப்புகளையும் உருவாக்கவும் முடியும்.

இத்தொடக்க Simulator Based பயிற்சித் திட்டம், கடற்றொழில் மற்றும் நீரியல் வள திணைக்களத்தின் பணிப்பாளர் நாயகம் சுசந்த கஹவத்த அவர்களின் தலைமையில் ஆரம்பிக்கப்பட்டது. இத்திட்டத்திற்கு நிதி மற்றும் ஏனைய ஒத்துழைப்புகளை வழங்கும் ஜெர்மன் குடியரசுடன் இணைந்த DVV International நிறுவனத்தைப் பிரதிநிதித்துவப்படுத்தி, தெற்காசியப் பிராந்தியப் பணிப்பாளர் Sonja Belete அம்மையார் உள்ளிட்ட அதிகாரிகளும், கடற்றொழில் மற்றும் நீரியல் வள திணைக்களத்தைப் பிரதிநிதித்துவப்படுத்தி அதிகாரிகள் குழுவொன்றும் இதில் கலந்துகொண்டனர்.